شرح كيفية التزاوج فى الكلاب ومدة الحيض

السلام عليكم ورحمة الله وبركاته


هنتكلم عن جوازات الكلاب عموما بعيد عن اي نوع سواء جيرمين او بيتبول او جريفون او حتي كوكيجن ....
اولا الذكر ....الذكر علشان يتجوز البلوغ من سن 7 او 8 شهور فيما فوق ...السن الافضل للزواج طبعا بعد ما الكلب يعدي السنه ويفضل سنه وشهرين الكلب الذكر ملهوش موسم تزاوج بيتجوز ف اي وقت عكس الانثي لو جوزت كلبك قبل ما يتم سنه احتماليه ان ميحصلش حمل 75%بالاضافه لان الكلب اللي بيتجوز صغير جسمه بيبقي قليل جدا ونموه بيقل جدا
بالنسبه للانثي...الحيضه الاولي للكلبه من عمر 6 شهور فيما فوق برضه يعني ممكن تتأخر اول حيضه لحد عمر 12 شهر
ميعاد التزاوج للانثي يفضل انك تفوت اول حيضه وتجوز من تاني حيضه ويفضل بعد عمر 14 شهر برضه علشان النمو الجسدي ونمو الجهاز التناسلي يكون اكتمل ..مواعيد الحيض للانثي بتنقسم لجزئين ..
1- لو الانثي اتجوزت وتم الحمل بيبقي ميعاد الحيضه كل 6 شهور 2-لو الانثي متجوزتش الحيضه الجايه بتيجي بعد 4 او 5 شهور لو المواعيد اختلفت عن كده هيبقي في خلل ف الهرمونات ولازم تتابع مع دكتور علشان تنظم الموضوع ده...
*__________*__________*__________*__________*_____ _____*__________*
كيفيه االزواج
مدة الحيض عند الانثي من 14 الى 15 يوم هناك كلاب فترة التزواج تصل الى 19 يوم
الحيض عباره عن ايه ؟ الحيض فتره ما قبل الحمل للانثي
بيحصل ازاي ؟ الحيض بيبدأ لما البويضه بتسقط لمنطقه الرحم استعداد للتخصيب و بتسبب تهدم بطانه الرحم علشان تثبت في الرحم استعداد لاستقبال الحيوان المنوي ...
اعراض الحيض الظاهره للناس بتبقي عباره عن خروج دم من فتحه التناسل ف الانثي وبيستمر نزول الدم لمده 9 ايام "زياده يوم اقل يوم"
امتي بتبدأ عمليه الزواج ؟ اول لما الانثي بتمنع نزول دم من فتحه التناسل بيبقي ف اليوم ال9
عمليه التزاوج بتستمر فتره توصل ل9 ايام عمليه الزواج اعتادنا انها بتتم 3 مرات يوم بعد يوم يعني اليوم ال9-11-13او اليوم ال11-13-15
في حالات كتير بيتم الحمل من مرتين فقط ..
----------مشاكل الزواج
بالنسبه للذكر...ساعات كتير بيبقي الكلب مش عايز يتجوز والكلبه قدامه هتعمل ايه ؟ هتبعد الكلبه عنه خالص تعزلهم عن بعض لمده 24 ساعه كامله و بعد كده تدخل الكلبه عليه مكانه مش العكس هيحصل حاجه من الاتنين 1-الذكر هيحاول يتجوز ومش هيعرف ساعتها في ناس متخصصين تقدر تجوزه وليها طرق كتير طبعا مينفعش نتكلم عليها هنا 2-الذكر مش هيحاول يقربلها خالص ساعتها الكلب ده مش مستعد نفسيا للزواج اصلا
بالنسبه للانثي....ساعات الانثي بتبقي مش قابله الذكر يقربلها ويتجوزها وف الغالب بيبقي ف اول جوازه ساعتها هتلبس الكلبه كمامه وتمسكها للذكر وان شاء الله هتتجوز ....
*__________*__________*__________*__________*_____ _____*__________*
اتكلمنا عن الجواز وكيفيه اتمام عمليه الزواج ...دلوقتي هتكلم عن الحمل و رعايه الجراوي
اولا الحمل ... اتكلمنا عن الزواج وقولنا بتتم عمليه الزواج 3 مرات يوم بعد يوم
فتره الحمل بتتراوح من 55 ل 68 يوم وده ف الحالات اللي فيها مشاكل او مش منتظمه لكن الطبيعي شهرين 60 يوم
امتي تعرف ان الكلبه حامل .. لو اول جوازه للكلبه هيبان عليها ف اول اسبوع الحلمات هيتحول لونها للون الوردي الصدر هينزل نسبيا هيبقي في تغير طبيعي واضح استعداد للحمل لو مش اول مره تحمل هيبدأ يظهر عليها اعراض الحمل بدايه من الاسبوع الرابع او الخامس
هتلاحظ همدان الكلبه ف حركتها هتقل طبيعي انتفاخ ف البطن نتيجه الحمل شهيتها هتزيد بشكل ملحوظ وهتاكل بمعدلات كبيره
الاستعدادات
اول حاجه يفضل الكلبه الحامل تتعزل عن اي كلاب علشان الاجهاد سواء باللعب مع كلاب تانيه او بالخناق مع كلاب تانيه
يفضل عدم رؤيه الكلبه الحامل اي غريب علشان متخافش او تهجم عليه او تنبح عليه وتبذل مجهود كبير
يفضل تمشيه الكلبه الحامل لمده نص ساعه يوميا بشكل منتظم
قبل الولاده بيومين هتلاحظ انتفاخ البطن طبعا بالاضافه لانقطاع الكلبه عن الاكل اخر يوم قبل الولاده هتلاحظ وجود لبن ف صدر الكلبه ف اخر 3 ايام قبل الولاده وممكن اقل حتي لحظه الولاده
الكلبه بتولد ...ممنوع وجود اي كائن غريب عليها ولا كلب ولا بني ادم ممكن يحصل حاجه من الاتنين
1-هتوقف عمليه الولاده والجراوي هتموت ف بطنها وتنزلهم ميتين2-هتولد و تاكل الجراوي من الخوف عليهم
الكلبه لو طولت ف عمليه الولاده عن 6 ساعات وانت شايف ان لسه في جراوي ف بطنها يعني جابت جرو واحد وبس هتبدأ تتدخل وتديلها حقنه طلق صناعي
تمت عمليه الولاده كامله والحمدلله الكلبه صدرها مفيهوش لبن هتجيب اقراص من الصيدليه اسمها ماتيرنا وتديلها قرصين بعد كده قرص كل يوم
الكلبه عندها صديد "هتعرف ازاي ان عندها صديد" هتلاقي اللبن لونه اصفر
طيب لحد لما الكلبه صدرها ينزل لبن اعمل ايه ؟ هتجيب لبن صناعي ويفضل-رويال كانين "بيطري" لو ملقيتش رويال كانين هتجيب لبن اسمه "بيبي لاك" اهم حاجه يكون اللبن خالي من ماده اللاكتوز لان الماده دي الجراوي مبتقدرش تهضمها وبتسبب انتفاخ
ترضع الجراوي 3 سم من اللبن كل 3 ساعات وبعد عمليه الرضاعه هتمسح بقطنه منطقه الشرج بانتظام لحد لما الجرو يعمل حمام
لو لقيت جرو ضعيف تعمل ايه هتقربه لصدر امه اكتر او ترضعه صناعي افضل
لو لقيت جرو بيموت درجه حرارته بارده جدا بقي ساقع وبيموت تلحقه ازاي؟ هتجيب جلوكوز5% و تدفيه ف ميه سخنه و تدي 5 سم بالفم للجرو
الجراوي تبدأ تاكل من عمر 21 يوم 3 اسابيع

والسلام عليكم ورحمة الله وبركاته
وكـــــــل سنـــــة وانتم طيبـــــين